நீட்: தேர்வைத் தாண்டி ஒரு பெரிய கேள்வி

தொழிலொக்கும் எல்லா உயிர்க்கும் சிறப்பொவ்வா

செய் திறன் வேற்றுமையான்

– டாக்டர் மீரா சுதீர், இயக்குநர், IMPCOPS; நிறுவனர், ஸ்ரீஹரீயம் ஆயுர்வேதம்

பதற்றமல்ல, நம்பிக்கை தேவை

நீட் தேர்வைச் சுற்றியுள்ள விவாதங்களும் சமூக ஊடகங்களில் பரவும் பல்வேறு தகவல்களும் மாணவர்களிடமும் பெற்றோர்களிடமும் பதற்றத்தை உருவாக்கி வருகின்றன. தேர்வு அமைப்பின் பாதுகாப்பிற்காக வினாத்தாள்கள் சில சமயங்களில் ஹெலிகாப்டர்கள் மூலமாகவும், பல மாநிலங்களில் மூன்று அடுக்கு பாதுகாப்பு ஏற்பாடுகளுடனும் கொண்டு செல்லப்படுகின்றன. ஆகையால் மாணவர்களும் பெற்றோர்களும் தேவையற்ற அச்சத்திற்கு ஆளாக வேண்டியதில்லை. சுவாரஸ்யமான ஒரு நிகழ்வாக, இந்த ஆண்டின் நீட் தேர்வுக் காலமும் ஜூன் 21 உலக யோகா தினமும் ஒரே காலகட்டத்தில் அமைந்துள்ளன. எனவே மனதை குழப்பிக்கொள்ளாமல், மாணவர்களும் பெற்றோர்களும் சில நிமிடங்கள் யோகா, பிராணாயாமம் மற்றும் தியானம் செய்து பதற்றத்திற்கு பதிலாக நம்பிக்கையுடனும் மன அமைதியுடனும் இந்த காலத்தை எதிர்கொள்வதே சிறந்த அணுகுமுறையாகும்.

நீட் - ஏகலவ்யனை முதலில் சரியாகப் புரிந்துகொள்வோம்..

ஏகலவ்யன் -பொதுவாக அவர் புறக்கணிக்கப்பட்ட மாணவனாக மட்டுமே சித்தரிக்கப்படுகிறார். ஆனால் ஹரிவம்சத்தில் காணப்படும் ஒரு மரபுப்படி, ஏகலவ்யன் வாசுதேவரின் சகோதரரின் மகனாகப் பிறந்து – (அதாவது, ஏகலவ்யன் கண்ணனின் சொந்த இரத்த உறவினர் ஆவார்). காட்டில் கைவிடப்பட்டு பின்னர் வனப்பகுதியின் இளவரசராக வளர்ந்தவர் எனக் கூறப்படுகிறது. தனது குருவால் தண்டிக்கப்பட்ட பின்னரும், பின்னாளில் யுதிஷ்டிரரின் ராஜசூய யாகத்திற்கு அழைக்கப்பட்டு உயர்ந்த மரியாதை பெற்றதாகவும் அந்த மரபு கூறுகிறது.

இந்தக் கதையின் பல்வேறு விளக்கங்கள் எதுவாக இருந்தாலும், பிறப்பை விட முயற்சி, திறமை, ஒழுக்கம் மற்றும் விடாமுயற்சியே ஒருவரை உயர்த்தும் என்பதே அதன் மையச் செய்தியாகும்.

மருத்துவத் துறையின் நிதர்சனம்

மருத்துவக் கல்வி குறித்து கவலைப்படும் பெற்றோர்களும் மாணவர்களும் முதலில் மருத்துவத் துறையின் நிதர்சனத்தைப் புரிந்துகொள்ள வேண்டும். உலகம் முழுவதும் எந்த ஒரு மருத்துவ முறையும் அனைத்து நோய்களுக்கும் முழுமையான தீர்வை வழங்குவதாகக் கூறப்படுவதில்லை. அவசர சிகிச்சை, தீவிர சிகிச்சை மற்றும் அறுவை சிகிச்சைகளில் நவீன மருத்துவம் சிறந்து விளங்குகிறது. அதே நேரத்தில் நோய் தடுப்பு, வாழ்க்கை முறை மேலாண்மை மற்றும் முழுமையான ஆரோக்கிய அணுகுமுறைகளில் ஆயுஷ் மருத்துவ முறைகள் முக்கிய பங்காற்றுகின்றன.

இந்தியாவில் எதிர்கால சுகாதார அமைப்பு பல்வேறு மருத்துவ முறைகள் ஒன்றையொன்று புரிந்துகொண்டு செயல்படும் ஒருங்கிணைந்த திசையை நோக்கி நகர்கிறது. பல்வேறு மருத்துவ மரபுகளின் வலிமைகளைப் பயன்படுத்துவதே நோக்கம்.

MBBS முடிந்தால் உடனே வெற்றி கிடைக்குமா?

மருத்துவக் கல்லூரியில் சேர்வதே வாழ்க்கையின் இறுதி இலக்கு அல்ல. எம்பிபிஎஸ் முடித்த முதல் நாளிலேயே யாரும் ஒரு கோடி ரூபாயை மருத்துவரின் கையில் கொடுத்து விடுவதில்லை. அதன் பிறகு கண் மருத்துவம், இதய மருத்துவம், அறுவை சிகிச்சை, குழந்தை மருத்துவம் போன்ற துறைகளில் மேற்படிப்பிற்காக மீண்டும் போட்டித் தேர்வுகள் மற்றும் பல ஆண்டுகால பயிற்சிகள் தேவைப்படுகின்றன.

மேற்படிப்பு முடிந்த பிறகும் அனுபவம், நம்பிக்கை மற்றும் நோயாளிகளின் மதிப்பு ஆகியவை காலப்போக்கில் மட்டுமே உருவாகின்றன. சமூக ஊடகங்களில் மருத்துவர்களின் பொருளாதார சவால்களை நகைச்சுவையாக சித்தரிக்கும் காணொளிகள் கூட பரவி வருகின்றன. மருத்துவம் என்பது உயர்ந்த சேவைத் துறையாக இருந்தாலும் அது எளிதான பாதை அல்ல.

குற்றச்சாட்டுகளுக்கும் விமர்சனங்களுக்கும் மத்தியில் மருத்துவர்கள்

மருத்துவத் துறை மனிதநேயப் பணி என்று கூறும் சமுதாயமே, மருத்துவர்களின் வருமானம், பரிந்துரைகள், பரிசோதனைகள் மற்றும் சிகிச்சை முறைகள் குறித்து பல நேரங்களில் குற்றச்சாட்டுகளையும் முன்வைக்கிறது. அலோபதி மருத்துவர்களாக இருந்தாலும், ஆயுஷ் மருத்துவர்களாக இருந்தாலும், பக்கவிளைவுகள், சிகிச்சைச் செலவுகள், குணமடையும் வேகம், மருந்துகளின் தன்மை போன்ற பல காரணங்களுக்காக விமர்சனங்களை எதிர்கொள்கின்றனர்.

எனவே மருத்துவம் என்பது வெறும் சமூக அந்தஸ்திற்காகத் தேர்வு செய்யப்படும் தொழில் அல்ல; நீண்டகால அர்ப்பணிப்பு, பொறுப்பு உணர்வு மற்றும் தொடர்ச்சியான கற்றல் தேவைப்படும் துறையாகும்.

நீட்: அரசியல் கோஷமா, தேசியக் கேள்வியா?

நீட் பற்றிய விவாதம் வெறும் ஒரு தேர்வைப் பற்றியது அல்ல. அது கல்வி சமத்துவம், மாநில உரிமைகள், மாணவர்களின் மனநலம் மற்றும் மருத்துவக் கல்வியின் எதிர்காலம் ஆகியவற்றைச் சுற்றியுள்ள ஒரு பெரிய தேசிய விவாதமாக மாறியுள்ளது. தமிழ்நாட்டில் பல அரசியல் கட்சிகள் நீட் தேர்வுக்கு எதிராக கருத்து தெரிவித்து வருகின்றன. மாண்புமிகு ஜோசப் விஜய் அவர்கள் அரசியலுக்குள் நுழைந்த பின்னர் தனது ஆரம்பகட்ட ஆட்சியிலேயே பல புதிய அணுகுமுறைகளால் கவனம் பெற்றுள்ளார். எதிர்காலத்தில் அவரது அரசியல் செல்வாக்கு தமிழ்நாட்டைத் தாண்டி தேசிய அளவிற்கும் விரிவடையக்கூடும் என்று பலர் கருதுகின்றனர். அத்தகைய சூழலில் அவர் ஒருநாள் இந்தியாவின் பிரதமராகி அனைத்து மாநிலங்களின் நலனையும் சமமாகப் பார்க்க வேண்டிய பொறுப்பில் இருந்தால், தமிழ்நாட்டிற்கு மட்டும் நீட் விலக்கு வழங்குவது சாத்தியமா என்ற கேள்வி இயல்பாக எழுகிறது. அல்லது அனைத்து மாநிலங்களுக்கும் ஒரே அளவுகோல் இருக்க வேண்டுமா? இந்தக் கேள்விகளுக்கான பதில்கள் உணர்ச்சிகளால் அல்ல, அறிவியல் ரீதியாக ஆராயப்பட வேண்டும்.

பிறப்புரிமையா? தகுதியா?

இந்திய விடுதலைக்கு முன்னர் பல தொழில்கள் பரம்பரை அடிப்படையில் தொடரப்பட்டன. ஆனால் விடுதலைக்குப் பிறகு இந்திய அரசியலமைப்பு கல்வியும் தொழிலும் பிறப்பால் அல்ல, தகுதியால் தீர்மானிக்கப்பட வேண்டும் என்ற கொள்கையை ஏற்றுக்கொண்டது.

ஒரு எம்பிபிஎஸ் மருத்துவரின் மகன் மருத்துவராக வேண்டும் என்றாலும், ஒரு சித்த மருத்துவரின் மகள் சித்த மருத்துவராக வேண்டும் என்றாலும், அல்லது வரலாற்றில் மருத்துவச் செயல்பாடுகளில் ஈடுபட்ட சமூகங்களின் வாரிசுகள் மருத்துவராக வேண்டும் என்றாலும், சேர்க்கை தகுதியின் அடிப்படையில்தான் வழங்கப்பட வேண்டும் என்பதே நமது குடியரசின் அடிப்படை நெறிமுறை.

நீட் இல்லையென்றால் மாற்று என்ன?

நீட் இல்லாத சூழலில் மாநிலப் பாடத்திட்டம், CBSE, ICSE, IGCSE, state board மற்றும் பிற கல்வி வாரியங்களில் இருந்து வரும் மாணவர்களை எவ்வாறு ஒப்பிடுவது என்பது மிகப் பெரிய சவாலாகும். ஒவ்வொரு வாரியமும் வெவ்வேறு பாடப்புத்தகங்கள், தேர்வு முறைகள், மதிப்பீட்டு தரங்கள் மற்றும் கற்றல் ஆழங்களைப் பின்பற்றுகின்றன.

ஒரு வாரியத்தில் 90 மதிப்பெண் பெறுவது மற்றொரு வாரியத்தில் 99 மதிப்பெண் பெறுவதற்கு சமமாக இருக்கலாம். இதனால் அனைத்து மாணவர்களையும் ஒரே அளவுகோலில் ஒப்பிடுவது எளிதான காரியம் அல்ல.

சமநிலைக் காரணி ஒரு தீர்வா?

கணிதம், இயற்பியல், வேதியியல் மற்றும் உயிரியல் பாடங்களின் பாடத்திட்ட ஆழம், பரப்பு, கேள்வி அமைப்பு, செய்முறைப் பயிற்சி, வாய்மொழித் தேர்வு மற்றும் மதிப்பீட்டு முறைகளை அடிப்படையாகக் கொண்டு ஒவ்வொரு கல்வி வாரியத்திற்கும் ஒரு "சமநிலைக் காரணி" (Normalization Constant) உருவாக்க முடியுமா என்பது ஆய்வு செய்யப்பட வேண்டும்.

அந்தக் காரணியை மாணவர்களின் இறுதி மதிப்பெண்களுடன் இணைத்து மருத்துவக் கல்லூரி சேர்க்கையில் பயன்படுத்துவது குறித்து கல்வியாளர்கள், கணித மற்றும் புள்ளியியல் வல்லுநர்கள், மாநில மற்றும் மத்திய அரசுகளின் பிரதிநிதிகள், அரசு மற்றும் தனியார் மருத்துவக் கல்லூரிகள், பெற்றோர் அமைப்புகள் மற்றும் மாணவர் நல நிபுணர்கள் அடங்கிய தேசியக் குழு ஆய்வு செய்து பரிந்துரைகள் வழங்கலாம்.

நீட் மட்டும்தான் வாழ்க்கையா?

பெற்றோர்களும் மாணவர்களும் நினைவில் கொள்ள வேண்டிய முக்கியமான உண்மை என்னவெனில், மருத்துவ உலகம் இன்று எம்பிபிஎஸ் அல்லது நீட் தேர்வால் மட்டும் வரையறுக்கப்படுவதில்லை. ஆராய்ச்சி மற்றும் ஒருங்கிணைந்த சுகாதாரத் துறைகளில் மிகப் பெரிய வாய்ப்புகள் உருவாகி வருகின்றன.

குறிப்பாக ஆயுர்வேதம், சித்தம், யுனானி, யோகா, இயற்கை மருத்துவம் போன்ற துறைகளில் ஆராய்ச்சி, புதுமை, உலகளாவிய காப்புரிமைகள் (Patents), நலவாழ்வு தயாரிப்புகள் மற்றும் தொழில்முனைவு வாய்ப்புகள் விரிவடைந்து வருகின்றன. இந்தியாவின் பாரம்பரிய மருத்துவ அறிவு உலகளவில் அதிக கவனத்தைப் பெற்று வருகிறது.

மாற்றுப் பாதைகளும் வெற்றிப் பாதைகளே

நீட் தேர்வில் வெற்றி பெறாதது வாழ்க்கையின் முடிவல்ல. B.Pharm, Clinical Research, Biotechnology, Microbiology, Biochemistry, Public Health, Medical Laboratory Technology, Physiotherapy, Occupational Therapy, Nutrition, Hospital Administration, Bioinformatics, Medical Device Technology போன்ற பல துறைகள் சுகாதார உலகின் முக்கிய அங்கங்களாக உள்ளன.

அதேபோல் யோகா, இயற்கை நலவாழ்வு, ஆரோக்கிய மேம்பாட்டு சேவைகள், சமூக சுகாதார கல்வி, மனநல ஆதரவு மற்றும் ஒருங்கிணைந்த சுகாதாரத் துறைகளிலும் மிகப் பெரிய வாய்ப்புகள் உருவாகி வருகின்றன.

முடிவுரை

நீட் பற்றிய விவாதம் "வேண்டும்" அல்லது "வேண்டாம்" என்ற இரு முனைகளில் மட்டும் சிக்கிக்கொள்ளக் கூடாது. மாணவர்களுக்கு சமமான வாய்ப்பை எவ்வாறு வழங்குவது, மனஅழுத்தத்தை எவ்வாறு குறைப்பது, மருத்துவக் கல்வியின் தரத்தை எவ்வாறு உயர்த்துவது, மாநிலங்களின் தனித்துவத்தை எவ்வாறு மதிப்பது என்பதற்கான நீடித்த தீர்வுகளைத் தேட வேண்டும்.

தேர்வுகள் வெளிப்படையாகவும் பாதுகாப்பாகவும் நடத்தப்பட வேண்டும். ஆராய்ச்சி, மருந்தியல், யோகா, பொது சுகாதாரம் மற்றும் பல துறைகளிலும் ஆயிரக்கணக்கான வெற்றிக் கதைகள் உருவாகின்றன.அரசியல் தலைவர்கள், திரைப்படத் துறை பிரபலங்கள், மருத்துவர்கள், தன்னார்வத் தொண்டு நிறுவனங்கள், ஊடகங்கள், சமூக ஊடகத் தளங்கள் மற்றும் பெற்றோர்கள் ஆகிய அனைவருக்கும் இங்கு ஒரு முக்கியப் பொறுப்பு உள்ளது. வதந்திகளையும் அச்சத்தையும் பரப்புவதற்குப் பதிலாக, மாணவர்களுக்கு நம்பிக்கை அளிக்கும், மனஅழுத்தத்தைக் குறைக்கும் மற்றும் தீர்வுகளை முன்வைக்கும் அணுகுமுறையை ஊக்குவிக்க வேண்டும்.

முறையான தேர்வு நிர்வாகம், அமைதியான மனநிலை, பொறுப்பான பொதுவிவாதம், பெற்றோரின் புரிதலும் ஆதரவும், மேலும் நீட்டிற்கு உள்ளும் வெளியும் வெற்றிகரமான வாழ்க்கைப் பாதைகள் இருப்பதைப் பற்றிய விழிப்புணர்வும் அடுத்த தலைமுறைக்கு பாதுகாப்பான, மகிழ்ச்சியான மற்றும் நம்பிக்கையான எதிர்காலத்தை உருவாக்கும்.